Ahmad Faraz

Qurbat Bhi Nahin Dil Se Utar Bhi Nahin Jata, + 5 Ghazals By Ahmed Faraz

Advertisements

Qurbat Bhi Nahin Dil Se Utar Bhi Nahin Jata,
Woh Shakhss Koi Faisla Kar Bhi Nahin Jata,

Advertisements

Ankhen Hain Ke Khaali Nahin Rehti Hain Lahuu Se,
Aur Zakham-E-Judai Hai Ke Bhar Bhi Nahin Jata,

Woh Rahat-E-Jaan Hain Magar Is Darbadri Main,
Aesa Hai Ke Ab Dheyaan Udhar Bhi Nahin Jata,

Hum Dohri Aziyat Ke Giraftaar Musaafir,
Paaon Bhi Hain Shall Shauq-E-Safar Bhi Nahin Jata,

Advertisements

Dil Ko Teri Chahat Pe Bharosa Bhi Bohat Hai,
Aur Tujh Se Bicharr Jaane Ka Ddar Bhi Nahin Jata,

Pagal Huye Jaate Ho ‘Faraz’ Us Se Mile Kya,
Itni Si Khushi Se Koi Mar Bhi Nahin Jata..

**********************

Us Ne Sukuut-E-Shab Main Bhi Apna Payaam Rakh Diya,
Hijr Ki Raat Baam Pr Mah-E-Tamaam Rakh Diya,

Aamad-E-Dost Ki Naveed Ku-E-Wafaa Main Aam Thi,
Main Ne Bhi Ik Charaagh Sa Dil Sar-E-Shaam Rakh Diya,

Shiddat-E-Tishnagi Main Bhi Ghairat-E-Mai-Kashi Rahi,
Us Ne Jo Phair Li Nazar Main Bhi Jaam Rakh Diya,

Us Ne Nazar Nazar Main Hi Aise Bhale Sukhan Kahe,
Main Ne To Us Ke Paaon Main Sara Kalaam Rakh Diya,

Dekho Yeh Mere Khawab They Dekho Yeh Mere Zakham Hain,
Main Ne To Sab Hisaab-E-Jan Bar-Sar-E-Aam Rakh Diya,

Ab Ke Bahaar Ne Bhi Keen Aesi Sharaarten Ke Bas,
Kabk-E-Dari Ki Chaal Main Tera Khiraaam Rakh Diya,

Jo Bhi Mila Usi Ka Dil Halqa Ba-Gosh-E-Yaar Tha,
Us Ne To Saare Sheher Ko Kar Ke Ghulaam Rakh Diya,

Aur Faraz Chahiyen Kitni Mohabten Tujhe,
Maaon Ne Tere Naam Pr Bachon Ka Naam Rakh Diya..

**********************

Agarche Zor Hawaaon Ne Daal Rakha Hai,
Magar Charaagh Ne Lau Ko Sambhaal Rakha Hai,

Mohabton Main To Milna Hai Ya Ujad Jaana,
Mizaaj-E-Ishq Main Kab Etidaal Rakha Hai,

Bhale Dinon Ka Bharosa Hi Kya Rahen Na Rahe,
So Maine Rishta-E-Gham Ko Bahaal Rakha Hai,

Bhari Bahaar Main Ik Shaakh Pr Khilaa Hai Gulaab,
Ke Jaise Tu Ne Hatheli Pe Gaal Rakha Hai,

Faraz Ishq Ki Duniya To Khuubsurat Thi,
Yeh Kis Ne Fitna E Hijr O Visaal Rakha Hai..

**********************

Har Koi Dil Ki Hatheli Pe Hai Sehraa Rakhe,
Kis Ko Sairaab Kare Kise Pyaasa Rakhe,

Umar Bhar Kon Nibhaata Hai Taluq Itna,
Aye Meri Jaan Ke Dushman Tujhe Allah Rakhe,

Hum Ko Acha Nahin Lagta Koi Hum-Naam Tera,
Koi Tujh Sa Ho To Naam Bhi Tujh Sa Rakhe,

Dil Bhi Pagal Hai Ke Uss Shakss Se Wabasta Hai,
Jo Kisi Aur Ka Hone De Na Apna Rakhe,

Hanss Na Itna Bhi Faqeeron Ke Akele Pan Pr,
Ja Khuda Meri Tarah Tujh Ko Bhi Tanhaa Rakhe,

Yeh Qanaat Hai Itaaat Hai Ke Chahat Hai Faraz,
Hum To Raazi Hain Woh Jis Haal Main Jesa Rakhe..

**********************

Ab Is Shauq Se Ke Jaan Se Guzar Jana Chahiye,
Bol Ae Havaa-E-Sheher Kidhar Jana Chahiye,

Kab Tak Isi Ko Aakhri Manzil Kahen Ge Hum,
Kuu-E-Muraad Se Bhi Udhar Jana Chahiye,

Woh Waqt Aa Geya Hai Ke Saahil Ko Chorr Kar,
Gehre Samundron Main Utar Jana Chahiye,

Ab Raftagaan Ki Baat Nahin Kaarvaan Ki Hai,
Jiss Samt Bhi Ho Gard-E-Safar Jaana Chahiye,

Ya Apni Khawhishon Ko Muqaddass Na Jaante,
Ya Khawhishon Ke Saath Hi Mar Jaana Chahiye..

**********************

Leave a Comment